{"product_id":"book-jukt","title":"He Whare Mōteatea mō ngā Mātauranga Waiata Tūhoe","description":"\u003cp\u003eKo tā tēnei tūtohinga whakapae he whakautu i te urupounamu, arā kai hea rā he whare mōteatea mō ngā mātauranga waiata o tōku iwi? Inā hoki e whakapae ana ko tā te mōteatea he pupuri i te toi o te kupu, i te tiketiketanga o te reo taketake Tūhoe.\u003cem\u003e \u003c\/em\u003eKai te toi o hiwi whakaaro ko te ahu pēhea o tō tātau reo, otirā o wā tātau taonga katoa, kai te kapu o te ringaringa te mahi nui ki te whakarite rautaki pae ora nui mō tō tātau reo tuatahi, tuarua mō wā tātau mōteatea e ora ai tēnei whare kōrero a Tūhoe. Ka waihangatia ai he tauira o te whare mōteatea mātauranga waiata Tūhoe. \u003c\/p\u003e\u003cp\u003eMātua kai o tātau mōteatea kura tawhito te tauira o te tohungatanga o ō tātau tīpuna ki te whakatakoto kupu, te whakatauira i te reo kaitito o uki. \u003cem\u003e \u003c\/em\u003eKo rātau te hunga wairua kia rātau, kia tūtaki atu kia kura kaitito mōteatea inamata, \u003cem\u003eko te tira hou tēnei te haramai nei\u003c\/em\u003e, te takahi nei i ngā tapuwae o rātau mā, te tito i ngā kōrero o te wā.\u003c\/p\u003e\u003cp\u003e\u003cem\u003eKo au ko Te Urewera ko Te Urewera ko au: \u003c\/em\u003eKai ō tātau mōteatea te wairua o te pepeha nei, mātua e noho pōhara tāngata ana ō tātau mārua, kua uaua te whai i te tauira kaitito o uki, nā reira tukuna mā te tito mōteatea ōna uri e whakahoki mai ki tōna ūkaipō, ki ōna pae maunga kia pureia e ngā hau o Tāwhirimātea.\u003c\/p\u003e\u003cp\u003e\u003cem\u003eKarangahia he huihuinga nui, whakaminea mai te iwi: \u003c\/em\u003eKo te hui ahurei ā Tūhoe te hui ā iwi whakahirahira katoa, kō tā ngā rangahau nei he whakatuwhera i te whare ahurea o te iwi, te waka kawe i te reo, i ngā taonga tuku iho ki te āke, āke.\u003c\/p\u003e\u003cp\u003e\u003cem\u003eHe hanga whare te tangata, he hanga tangata te whare, \u003c\/em\u003eka tūhono atu te whare ahurea ki ngā whare hou, whare kahikatoa o Tūhoe inamata. Hai whakakapi, tūturu e whakapono ana mā te whakatū whare mōteatea e ora ai o tātau mātauranga waiata Tūhoe. Rōpoipoihia ngā kaitito e tipu ai, e whanake ai te reo kaitito e ora ai te whare, kia rongohia ai e haruru ana ko te tiketike mōteatea ki te wao nui o Te Urewera āke, āke.\u003c\/p\u003e","brand":"INAudio","offers":[{"title":"Audiobook","offer_id":49403036336432,"sku":"BDjukt","price":20.0,"currency_code":"USD","in_stock":true}],"thumbnail_url":"\/\/cdn.shopify.com\/s\/files\/1\/0879\/2784\/9264\/files\/jukt-Square-cover.jpg?v=1773658753","url":"https:\/\/downpour.com\/products\/book-jukt","provider":"Downpour","version":"1.0","type":"link"}